Original: Deutsch
Zum Pälzer Worschtmarkt in Berlin 1935
En schöne Gruß in Pälzer Mundart von Bad Dürkeim un de ganze Palz
(von Karl Räder in Bad Dürkheim)
Sz(?)! Als Begrüßungsprolog bei der Eröffnung des Berliner Worschtmarkts gedacht
Grüßgott ehr Pälzer in Berlin,
Im Herz vun Deutschland stolz un kühn!
En Gruß vun unsre ganze Palz
Sie fallt im Geischt Euch um de Hals!
Viel Grüß vum deutsche pälzer Wei(n)!
Vum Westrich, Nordpalz, Gäu und Rhei(n)!
Vorab en Gruß auf Pälzer Art,
Vum schöne Derkem an de Haardt!
Als Bote bin ich, hochbeglückt,
Vun Derkem uf Berlin geschickt.
Vun Derkem wu seit groer Zeit
De Worschtmarkt g´feiert werd bis heut.
Die Riesekerb´ vum pälzer Wei(n),
´S Volksfescht vun unsre Palz am Rhei(n)!
Uns Derkmer, de ganz Saar un Palz,
Klobbt stolz heut´s Herz bis an de Hals.
Daß unser Landsleut so sich mühn,
Un Worschtmarkt feiern in Berlin!
Die ganz Palz fühlt tief – wie sich´s g´hört,
Dorch Euren Worschtmarkt hoch geehrt,
Weil mer dra(n) rausfühlt, u(n)getrübt,
wie ehr die Pälzer Hämet liebt!
Jetzt is es Pälzer Herbscht dehäm.
Gääl strahlen hell die Käschdebäm.
Blutrot blinkt´s Lab vum Portugieser,
Im Wingert singen froh die Lieser (Leser).
In jeder Scheuer laft die Kelter
Blo-sunn´ger Duft leiht uf de Felder.
Die ganz Haardt riecht nooh neuem Wei(n)!
Wie schö(n) is doch die Palz am Rhei(n)!
Doch jetzt zum Worschtmarkt in Berlin!
Er is (wie manchem vielleicht schien!)
Nit bloß e Fescht for Wei(n), zu blose,
Un ausgelosse rumzerose.
Am Sekt zu lebbre for de Dorscht
For bloß zu achle Pälzer Worscht,
Zu danse un die Mäd zu küssen,
wie uf de Derkmer Worschtmarktswissen.
De Pälzer Worschtmarkt in Berlin
Zu dem sie hunnerdweis heut ziehn,
is nit allee(n), mit alle Naube(?),
E Fescht vum deutsche Wei(n) un Traube:
Er is do in de Kammersäl
Berlin S. W., im Gegedäl
E Volksfescht in de „Neue Zeit“:
Vun deutscher Volksverbundenheit!
Is en Beweis wie jung un alte,
Treu zu de Pälzer Hämet halte.
Zum Land vun Fleiß, Humor un Wei(n)
Zur deutsche Grenzmark links vum Rhei(n).
Die Zeite sin vorbei gottlob,
Wu´s g´häße hot: „Du dummer Schwob“!
Du pälzer Krischer! (beispielsweis),
Du Knödelbayer, du frecher Preuß!
Heut sin mer - ´s mopst manch frühern König –
Heut sin mer Deutsche un sin enig!
Trotz Sang, Humor un Worschtmarktsbosse
Fühlt jeder sich als Volksgenosse!
So is de Worschtmarkt hie, jawohl,
E urdeutsch Einigkeitssymbol!
Do gibts ken Graddel, Haß un Neid,
Ke Zorn, Eifersucht un Streit.
Do gibts ke Protze uf viel Mittel,
Uf Orde, Backeschmiß un Titel!
An Worschtmarkt is ken Mensch so dumm
Un nimmt em anre ebbes krumm!
Do gibt’s bloß ens: froh-enig sei(n)
Versöhnt und inspiriert vum Wei(n).
Vum klore Wei(n) vun Pälzer Rebe.
Vum Kern-Extrakt vum Pälzer Leben!
De Völkerbund könnt ohne Schämme
E Vorbild sich am Worschtmarkt nemme!
De Pälzer Wei(n)bau dankts Euch heut
Ehr Palz-Berliner voller Schneid,
daß ehr voll Weitblick u(n)geniert,
In Deutschland an die Spitz marschiert,
Als Werber for de Pälzer Wei(n),
Als Streiter for die Palz am Rhei(n),
Daß mit kämpft dorch dünn un dick,
Wie unser Landsmann Dr. Frick!
De Worschtmarkt in Berlin heut nacht
Is for de Pälzer Wei(n) e Schlacht.
E Schlacht bei Froh- und Einigsei(n)
For Pälzer Wei(n), for deutsche Wei(n)!
Doch trinkt´n nit aus Steig(?) un Brenk
Der 34er hot die Kränk!
Wei(n)trinke muß mer mit Gefühl
Un mit Verstand un – nit zuviel!
Do wollen mer, ehr Freund, ehr Teure,
Stolz den Berliner Worschtmarkt feire!
Un in dem Sinn heb´ich mei(n) Glas
Mit edlem Derkmer an mei(n) Nas:
Ergreift die Glässer, groß un klei(n),
Erhebt Euch! – Stellt Euch uf die Bee(n)!
Bahnfrei dem Pälzer Edelwei(n)
Aus Deutschlands Grenzmark links vum Rhei(n)!
Stoßt an! Ein Prost mit Herz un Hand!
Hoch unser Palz beim Vaterland!
Bad Dürkheim, Räderklause
den 11/10 1935 Karl Räder