Original: Deutsch
Herrn Heinz
Anbei wunschgemäß:
„Neues vum Worschtmarkt 1935“
Heil! K. Räder
17/8 35
Neues vum Derkemer Worschtmarkt
(von Ernst Fröhlich, Bad Dürkheim)
Was is dann mit´m Worschtmarkt los?!
Der is jo fascht noch ´mal so groß!
Do kennt mer sich jo nimmi aus!
Die Hauptstroß vor de Polizenner
Is jetzt viel bräter un viel freier!
Un über die Siebert-Groß-Allee
Geht brät die Stroß fort, wunnerschö(n),
Un bringt, jo wie ehr sehe könnt,
Rechts niwer zu de Schubkarchständ!
Jetzt kann de Menschestrom sich frei
Verlafe ohne Drängerei!
Jetzt griehe ke Mädcher meh(r), ke Dicke
Ke bloe Flecke meh(r) vum dricke!
Un uf´m neue Feschtplatz draus
Was steht dann do vor e neues Haus?
E A(n)stalt is´s, wuhi ken Mann
En Stellvertreter schicke kann.
Un in dem Haus do stehn bereit
Zwä Dutzend „Sitz-Gelegenheit“!
Un 100 Mann könn´n – ohne Lache! –
Drin laufende Geschäfte mache!
Im nächschde Johr do will man baue
En zwätte Stock sogar for Fraue!
Un rechter Hand, mer glabt´s fascht nit,
steht jetzt die Franzreb-Riesehütt.
Un an de Stroß lang hinenaus,
do dehnen sich jetzt „Parkplätz“ aus;
Un weiter – man kummt fascht nit dorch:
E großi Wohnungs-Wageburg!
Un d´ Ungstee-Stroß – grad dorchgeführt –
Is for Verkehr nor reserviert!
Un am Gradierpark – s´is erreicht! –
Sin alle Bänk jetzt hell beleucht!
So daß ken neid´ge Dunkelmann
Dort meh im Trübe fische kann!
Die Gasfabrik-Saline-Stroß
Is jetzt en Parkplatz riesegroß!
Un ´s Derkmer neu schä(n) Brunnehaus
Das hebt de ganze Worschtmarkt raus!
Die Max- und Ludwigsquell, ehr Borscht,
Die machen g´sund un werken Dorscht!
Un ´s Derkmer Riesefaß, ehr Leut,
Is ah e „Sehenswürdigkeit!“
So könnt ich über „neue Sache“
Beim Worschtmarkt als noch weitermache!
Mer sieht, wie unsern Vadder Imbt
Die Worschtmarkts-Plän am Wickel nimmt!
Voll Tatkraft un voll Schwung un Schneid
Entsprechend unsrer große Zeit!
E Volksfeschd will de Worschtmarkt sei(n),
Sein Schützekönig is de Wei(n),
Un alle B´sucher – voller Bosse –
Soll´n fühle sich als Volksgenosse!
Vergeß sin Sorge, Lascht un Neid,
un Frohsinn herrscht in Ewigkeit!
Un der wu Streit a(n)fangt un Krach
Den dunke mer efach in die Bach!
Wann unne en´s kalt Wasser fühlt,
Werd er schon owe abgekühlt!
Un Schandarmerie un Polizei
Hot gar ke Ärbet dodebei!
Mer sieht ehr Männer un ehr Leut:
De Worschtmarkt der is vorbereit!
Un ganz Europa is in Gnade
Zur Pälzer Weinkerb ei(n)gelade!
Willkumm zum Riese-Stelldichei(n)
Bei Pälzer Brot un Worscht un Wei(n)!
17/8 35
Karl Räder